Nais idampi ang pisngi
Sa iyong mga labi
Ngayong huling buwan ng taon.
Gusto ko sanang yapusin ang
Iyong mukha bago
Dumatal ang bagong taon.
Dito
Sa kutsong nilalapatan
Ng aking likod,
batid na ang himlayan
Ng aking huling
pagkakataon.
Lagi kong inaalala
Ang hugis ng iyong mga mata
Sa saliw ng mga aparatong
Nagpapanatili sa aking buhay.
Hindi malilimutan ang
Liwanag ng iyong ngiti,
Sabay sa kaunting ilaw
Sa puting silid
Na aking sinisilip.
Sa huling buwan nitong taon,
Giit kong hindi na tatagal.
Mapait man itong taon,
Matamis naman ang alaalang
Dadalhin sa huling buwan
Ng aking buhay.
