15 ng Mayo

Uhaw nang matagal
Ang banos₁ na binungkal
Ng mga palad na pagal
Na waring putik-tingkal₂.
Kaya’t si San Isidro Labrador₃ na banal,
Kaniyang tinungo ang bukal
At tahimik niyang inusal,
“Alangaang dinggin yaring dasal
Binyagan ng luha ang bayang sakmal
Sa leeg ng Haring limbas-hangal.”
Pagputok nga ng liwanag kanyang ibinakal₄
Ang harabas₅ na hanging umunat sa pilay
Nang paniniwala ni Ingkong Polay:
Na ‘di na mababago pa ang taglay
Nilang kapalaran gaya ng niyang buhay
Ngunit laya’y patay
At maya-mayang hinahandungan sa kanyang balay₆
Ng mga panal₇ ng tagulaylay
Na para bang sa isang suhay
Ng nabubulok na mga butil ng palay.

<sub>1. Isang bloke o pitak ng lupa.
2. Tumigas na tipak ng lupa.
3. Pintakasi ng mga magbubukid.
4. Ibato o ibalibag.
5. Panabas ng palay.
6. Ilokano ng bahay.
7. Ibong-bukid na kumakain ng dumi ng kalabaw.</sub>

Si R. B. Abiva ay awtor at nagsusulat sa wikang Ilokano at Filipino, siya ay musikero, pintor, at iskultor.  Writing Fellow siya ng 58^th UPNWW (Tula), 11^th Palihang Rogelio Sicat (Maikling Kuwento), 6^th Cordillera Creative Writing Workshop (Tula), at 9^th Pasnaan- Jeremias A. Calixto Ilokano Writers Workshop (Daniw). Ang kanyang mga malikhaing akda ay nalathala na rin sa iba’t ibang magasin, pahayagan, at antolohiya. Ang SANIATA PRIZE 2019 (Ikalawang Gantimpala) ang pinakahuli niyang nasungkit na pagkilala. Sa ngayon ay kumukuha siya ng M.A- Malikhaing Pagsulat sa Unibersidad ng Pilipinas. Noong nakaraang taon ay kanyang itinatag ang Samahang Lazaro Francisco.